AMAKURU

Abarenga ibihumbi 11 bemerewe kwinjira muri Kaminuza y’u Rwanda

Kaminuza y’u Rwanda (UR) yatangaje urutonde rw’abanyeshuri bashya bemerewe by’agategenyo kuyinjiramo mu mwaka w’amashuri wa 2017/2018 barenga ibihumbi 11.

Umubare w’abanyeshuri bemerewe by’agategenyo, bangana n’ibihumbi 11 na 27(11027) muri 13, 124 bari basabye kiyigamo.

Kaminuza y’u Rwanda iheruka kubwira IGIHE ko imyanya ifite ingana n’ibihumbi 12 gusa.

Mu itangazo rigaragara ku rubuga rwayo kurva kuri uyu wa Gatatu, risaba buri munyeshuri wasabye kuyigamo, kureba niba ari ku rutonde rw’abo yemereye, abisanzeho bakihutira kujya gufata amabaruwa abemerera kwiga mu ishami runaka mu yagize iyi Kaminuza uko ari atandatu bitarenze ku wa 23 Kanama 2017.

Iryo tangazo rinasaba abemerewe bazajya gufata ayo mabaruwa, kwitwaza fotokopi y’impamyabumenyi zabo cyangwa ikindi kigaragaza amanota bagize( Result sleep) na fotokopi y’indangamuntu cyangwa passport.

Rivuga kandi ko kwiyandikisha ku mashami bemerewe kwigamo bizatangira ku wa 28 Kanama 2017.

Iryo tangazo rikomeza rimenyesha abemerewe kutarenza ku wa 29 Kanama bataramenyesha Kaminuza ko bazayigamo, kuko imyanya yabo ishobora guhabwa abandi bari ku rutonde rw’abasabye kuyigamo batatoranijwe.

Kaminuza y’u Rwanda itangaza ko urutonde rw’abari batanze imyirondoro ituzuye bagasabwa kubikosora, abemerewe bazashyirwa ahagaragara ku wa 21 Kanama 2017 kandi ko abatarabitanze bahawe italiki ntarengwa yo kuba babitanze ya 18 Kanama 2017 , uzarenze iyo taliki bitazasuzumwa.

Mu mwaka w’amashuri wa 2016/17 hasabye abanyeshuri 24,205, barimo 9,121 bifuzaga kwiga ibijyanye n’ubumenyi n’ikoranabuhanga, hemererwa gusa 17,165, barimo 6 899 bahawe kwiga ubumenyi n’ikoranubuhanga.

Kaminuza y’u Rwanda ifite amashami atandukanye hirya no hino mu gihugu arimo Ishami ry’Ubumenyi n’ikoranabuhanga; Ishami ry’ubuvuzi n’ubumenyi mu by’ubuzima ; Ishami ry’Ubucuruzi n’Ubukungu ; Ishami ry’uburezi ; Ishami ry’ubuhinzi, ubworozi n’ubuvuzi bw’amatungo; n’Ishami ry’Ubugeni n’ubumenyi rusange.

Abanyeshuri bemererwa kwinjira muri Kaminuza y’u Rwanda si ko bose bahabwa amafaranga yo kubatunga azwi nka Buruse. Abasabye kwiga muri UR bahita batangira inzira yo gusaba inguzanyo itangwa hagendewe ku manota, ibyo umuntu agiye kwiga n’icyiciro cy’ubudehe abarizwamo.

Abemerewe inguzanyo bashyirwa ahagaragara n’Ikigo gishinzwe guteza imbere uburezi (REB) nyuma y’uko Kaminuza yamaze gusohora abo yakiriye. Aba banyeshuri basinyana amasezerano na BRD yeguriwe inshingano zo gutanga no kwishyuza inguzanyo.

Biteganijwe ko urutonde rwa burundu ruzatangazwa nyuma yo gusuzuma ubusabe bw’abanyeshuri batanze ibyangombwa bituzuye basabwe kubyuzuza.

Ibyerekeye uyu mwanditsi

CYUZUZO AIME CHRISTIAN

Tanga ubutumwa

%d bloggers like this: