Siporo SPORT

Iranzi Jean Claude na Davis Kasirye berekeje muri Zesco United yo muri Zambia

Umunyarwanda ukinira ikipe y’igihugu Amavubi Iranzi Jean Claude n’Umunya-Uganda wakiniye Rayon Sports, Davis Kasirye bashyize umukono ku masezerano y’imyaka ibiri mu ikipe ya Zesco United ikina muri shampiyona y’icyiciro cya mbere muri Zambia.

Zesco United yashinzwe kuya 1 Mutarama 1974 iri mu makipe akomeye muri Zambian Premier league, ni iy’ikigo cya Leta gitanga amashanyarazi cyitwa ZESCO.

Iyi kipe ifite izina rikanganye no ku mugabane wa Afurika yasinyishije ingoga abakinnyi bane barimo Umunyarwanda Iranzi Jean Claude wamaze gutandukana n’Ikipe ya MFK Topvar Topoľčany yo mu cyiciro cya gatatu muri Slovakia yari yamuguze imukuye muri APR FC.

Mu minsi yashize byavuzwe ko Iranzi yifuzwaga n’iyi kipe ya Gisirikare ari na yo yamenyekaniyemo cyane ariko ibiganiro hagati y’impande zombi ntacyo byagezeho. Yari amaze icyumweru muri Zambia aho yakoraga imyitozo akaza gushimwa na Zlatko Krmpotić, Umunya- Serbia utoza ZESCO United F.C, benshi bita ‘Team Ya Ziko’, ‘Zegalacticos’, ‘Zega Mambo’ na ‘Team Zega.’

Abandi bakinnyi basinyishijwe n’iyi kipe barimo rutahizamu w’Umunya-Uganda Davis Kasirye wakiniraga Daring Club Motema Pembe (DCMP) ; Dieudonné Ntibahezwa n’umuzamu Enock Sabumukwama bose bakinaga muri Le Messenger de Ngozi y’i Burundi.

Aba bakinnyi b’ikipe bose berekanwe imbere y’itangazamakuru kuri uyu wa 1 Kanama 2017.

Rutahizamu Davis Kasirye wakinnye muri Rayon Sports akahava yerekeza muri DCMP yo muri Repubulika Iharanira Demokarasi ya Congo, ikipe avuyemo atsinze ibitego 13 mu mwaka umwe yahamaze, azahanganira umwanya n’Abanyakenya babiri asanze muri Zesco United barimo Jesse Were na Jackson Mwanza.

Zesco United izwi nka Zambia Electricity Supply Corporation United Football Club ikinira ku kibuga cya Levy Mwanawasa, giherereye i Ndola mu Majyaruguru ya Zambia. Iyi stade yatashywe mu 2012 yakira abantu 49,800.

Zesco United ihagarariye Zambia mu mikino ihuza amakipe yatwaye ibikombe by’igihugu, yabonye itike yo gukina iya ¼ cya Total CAF Confederation Cup aho izahura na Super Sports United yo muri Afurika y’Epfo hagati ya tariki 8-10 Nzeri 2017.

Iranzi Jean Claude na Davis Kasirye basinye amasezerano muri Zesco United

Iranzi Jean Claude (ibumoso) na Kalisa Rachid bakinanaga muri MFK Topvar Topo__any yo muri Slovakia

Kasirye yamenyekanye cyane akinira Rayon Sports mbere yo kwerekeza muri DCMP

Ibyerekeye uyu mwanditsi

CYUZUZO AIME CHRISTIAN

Tanga ubutumwa

%d bloggers like this: