AMAKURU Ubutabera umutekano

Polisi y’u Rwanda yizihije isabukuru y’imyaka 17, inashyira abapolisi 363 mu cyiciro cy’Abofisiye

Yanditswe na WEBMASTER

Inkuru dukesha urubuga IGIHE iravuga ko Aba bapolisi batangiye aya masomo muri Kanama 2016, akaba yari amaze amezi 10 biga ajyanye n’igipolisi, ubuyobozi (leadership), akarasisi, imyitozo ngororangingo n’andi anyuranye.

Aya masomo yatangiranye abanyeshuri 370 barimo 20 bari baturutse mu Rwego rw’Igihugu rushinzwe Imfungwa n’Abagororwa (RCS). Amasomo yasojwe n’abagera kuri 363 barimo ab’igitsina gore 33 mu gihe abandi barindwi batabashije kurangiza ku bw’impamvu zirimo iz’imyitwarire n’ibibazo by’ubuzima.

Uyu muhango wabanjirijwe no kwereka Minisitiri w’Ubutabera akaba anafite mu nshingano Polisi y’u Rwanda, Johnston Busingye, abofisiye barangije amahugurwa, bikurikirwa n’akarasisi kakozwe n’abo bapolisi.

Muri aya mahugurwa Mugengamanzi Christophe niwe wabashije kwitwara neza kurusha abandi, yakurikiwe na Uwimana Epiphanie ndetse na Sadiki Eric wabaye uwa gatatu. Aba bose bashyikirijwe ishimwe na Minisitiri w’Ubutabera, Johnston Busingye.

Umuyobozi mukuru w’Ishuri rya Polisi rya Gishari, CP Vianney Nshimiyimana, yavuze ko iri shuri ari rimwe mu afite inshingano yo gutanga amahugurwa ku bapolisi agamije kubongerera ubumenyi bwo kuzuza neza inshingano za polisi.

Yavuze ko aya mahugururwa ari icyiciro cya cyenda aho abayitabiririye barimo abasivili bigishijwe amasomo abategura kwinjira mu mwuga wa polisi.

Yasabye abarangije amahugurwa kuzarangwa n’indangagaciro nyarwanda n’ubunyamwuga mu byo bakora byose.

Yagize ati “Abangije aya masomo turabasaba kuzarangwa n’indangagaciro nyarwanda no kuzakorana ubunyamwuga imirimo ibategereje.”

Minisitiri w’Ubutabera, Johnston Busingye, yavuze ko muri aya mahugurwa n’andi agenewe ibindi byiciro by’abapolisi, hubakirwa ku nama zatanzwe na Perezida Kagame ubwo yasuraga Polisi y’igihugu umwaka ushize, aho yasabye ko ubwiyongere bw’umubare w’abapolisi bugomba kujyana n’ubumenyi, ubushobozi, n’ubunyamwuga.

Yibukije polisi kutirara bitewe n’uko iterambere ry’Isi rigenda rihindagurika bityo bikaba bigomba kujyana n’ubwiyongere bw’inshingano za polisi.

Ati “Uko iterambere ry’Isi ryihuta, niko inshingano za polisi ziyongera harimo n’ibikorwa byo kubungabunga amahoro ku Isi, niko n’amahugurwa n’ibindi bikenewe bifasha abapolisi kurangiza inshingano byiyongera.”

Polisi y’u Rwanda yashinzwe mu 2000; mu myaka 17 imaze ikaba yarakozemo ibikorwa binyuranye birimo kubungabunga umutekano haba mu gihugu no hanze yacyo mu butumwa bunyuranye.

Uretse ibyo kandi yagiye ikora n’ibikorwa biteza imbere abaturage nko kubagezaho amashanyarazi akomoka ku mirasire y’izuba, amazi, guhanga no gusana ibiraro n’ibindi bitandukanye byagiye bikorwa mu cyumweru cyahariwe ibikorwa byayo kizwi nka ‘Police Week’.

Muri uyu mwaka, ibi bikorwa byatangiye ku wa 16 Gicurasi, bikaba byari bimaze ukwezi bikorerwa hirya no hino mu gihugu.

 

 

 

Aya mahugurwa yasojwe n’abapolisi 363 muri 370 bari bayatangiye muri Kanama umwaka ushize

 

Ibyerekeye uyu mwanditsi

WEBMASTER

Tanga ubutumwa

%d bloggers like this: