Hanze Politike

Uko umuhango w’irahira rya Perezida Kagame wagenze (Amafoto)

Perezida w’u Rwanda, Paul Kagame yarahiriye kuyobora igihugu kuri uyu wa Gatanu, tariki ya 18 Kanama 2017, mu muhango witabiriwe n’abasaga ibihumbi 25 barimo abaperezida b’ibihugu, aba guverinoma n’abandi bayobozi bakuru barenga 20.

Abanyarwanda b’ingeri zitandukanye baturutse mu mfuruka zose z’igihugu bazindutse mu gitondo cya kare berekeza kuri Stade Amahoro aho Perezida Kagame yarahiriye kuyobora u Rwanda.

Aba barimo abantu 100 baturutse muri buri karere ko hanze y’Umujyi wa Kigali uko ari 27. Umujyi wa Kigali wo wahawe umwihariko muri uyu muhango kuko buri Karere kemerewe kohereza abantu 7000.

Muri uyu muhango kandi ibihugu hafi ya byose byo muri Afurika byari bifite umuyobozi ubihagarariye.

Perezida wa Centrafrique, Faustin-Archange Touadéra, niwe wabimburiye abandi kugera mu Rwanda aho yageze i Kanombe ahagana saa cyenda z’igicamunsi kuwa Kane, tariki ya 17 Kanama 2018.

UKO UMUHANGO WO KURAHIRA KWA PEREZIDA KAGAME WAGENZE UMUNOTA KU WUNDI

12:45: Perezida Kagame atangiye ijambo rye aho agize ati “Uyu munsi ni uwo kwishima nabashimira mwese. Ndagira ngo rero mbanze mbashimire ukuntu mwitabiriye ibi birori, n’ubundi ni ibyacu twese. Nkuko mubibona dufite abashyitsi benshi baje kwifatanya natwe muri ibi birori, harimo abakuru b’ibihugu byo muri Afurika n’inshuti z’u Rwanda nyinshi zaturutse hirya no hino ku isi.”

12:35: Itorero urukerereza niryo riri gususurutsa abantu bitabiriye uyu muhango kuri Stade Amahoro

Itorero ry’Igihugu Urukerereza ryasusurukije abitabiriye uyu muhango

Intore zo mu Itorero Urukerereza zivugaga imyato, abari n’abategarugori bacinya akadiho

Itorero ry’Igihugu Urukerereza ryasusurukije abitabiriye uyu muhango

Intore zo mu Itorero Urukerereza zivugaga imyato, abari n’abategarugori bacinya akadiho

12:20: Akarasisi ka gisirikare niko kari gukorwa muri aka kanya

Itorero ry’Igihugu Urukerereza ryasusurukije abitabiriye uyu muhango

12:00: Perezida Kagame amaze kurahirira kuyobora u Rwanda. Indahiro ye yakiriwe na Perezida w’Urukiko rw’Ikirenga, Prof Sam Rugege. Nyuma yo kurahira, ashyize umukono ku ndahiro, ahabwa ibendera ry’igihugu, ikirango cya Repubulika y’u Rwanda, ndetse n’indirimbo yubahiriza igihugu.

Yashyikirijwe kandi ingabo nk’ikimenyetso cyo kurinda igihugu.

Indahiro ya Perezida Kagame:

“Jyewe, Kagame Paul, ndahiriye u Rwanda ku mugaragaro: ko ntazahemukira Repubulika y’u Rwanda; ko nzakurikiza nkanarinda Itegeko Nshinga n’andi mategeko; ko nzakorana umurava imirimo nshinzwe; ko nzaharanira amahoro n’ubusugire bw’igihugu; ko nzashimangira ubumwe bw’Abanyarwanda;ko ntazigera nkoresha ububasha mpawe mu nyungu zanjye bwite; ko nzaharanira ibyagirira Abanyarwanda bose akamaro. Nintatira iyi ndahiro, nzabihanirwe n’amategeko,
Imana ibimfashemo.”

Perezida Kagame arahirira kuyobora u Rwanda muri manda y’imyaka irindwi

Perezida Kagame ashyira umukono ku ndahiro

Perezida w’Urukiko rw’Ikirenga, Prof. Sam Rugege ashyikiriza Perezida Paul Kagame ibendera ry’igihugu

Prof. Sam Rugege ashyikiriza Perezida Paul Kagame ikirangantego cy’igihugu

Umugaba Mukuru w’Ingabo z’u Rwanda, Gen Patrick Nyamvumba ashyikiriza Perezida Kagame ingabo yo kurinda igihugu

Soma: Perezida Kagame yarahiriye kuyobora u Rwanda muri manda y’imyaka irindwi

11:40: Minisitiri w’Ububanyi n’Amahanga w’u Rwanda, Louise Mushikiwabo, niwe uri kwakira abayobozi batandukanye bitabiriye uyu muhango. Barimo abakuru b’ibihugu 17; ba Visi Perezida babiri, Minisitiri w’Intebe n’abandi barimo abayobozi batandukanye

11:30: Abahagarariye amadini mu Rwanda barimo Mufti w’u Rwanda, Mufti w’u Rwanda, Salim Hitimana; Musenyeri w’Abangilikani, Archbishop Onesphore Rwaje na Musenyeri wa Diyosezi ya Butare, Philippe Rukamba, nibo bahawe umwanya kugira ngo basengere uyu muhango

11:25: Hari kuririmbwa indirimbo yubahiriza Umuryango wa Afurika y’Uburasirazuba aho u Rwanda ari igihugu cy’ikinyamuryango

11:20: Abanyarwanda basaga ibihumbi 25 bateraniye muri Stade Amahoro bahagurutse bose bakira Perezida Kagame na Madamu ubwo bageraga muri Stade Amahoro. Bose bateruriye rimwe baririmba ngo ‘Muzehe wacu’ abandi bati ‘Ni wowe’

Perezida Kagame asuhuza abaturage bateraniye kuri Stade Amahoro

11:15: Perezida wa Guinea akaba na Perezida w’Umuryango wa Afurika Yunze Ubumwe, Alpha Conde, nawe yitabiriye umuhango w’irahira rya Perezida Kagame

11:10: Perezida wa Senegal, Macky Sall na Sassou Nguesso wa Congo Brazaville, bombi bageze kuri Stade Amahoro bakurikiranye.

10:55: Perezida Idris Deby Itno uyobora Tchad, Faure Gnassingbé wa Togo nabo bamaze kugera kuri Stade Amahoro. Yakurikiwe na Minisitiri w’Intebe wa Ethiopia, Hailemariam Desalegn

Abakaraza babukereye mu kwakira abashyitsi

Perezida Itno (wambaye umweru) agera kuri Stade Amahoro

10:50: Perezida wa Djibouti, Ismaïl Omar Guelleh; Omar al-Bashir wa Sudani; Uhuru Kenyatta wa Kenya na Yoweli Kaguta Museveni bose bageze i Remera bakurikiranye

Museveni (ufite ingoferi mu ntoki) ubwo yakirwaga kuri Stade Amahoro

Perezida Yoweli Kaguta Museveni asuhuza abaturage bari kuri Stade Amahoro

10:40: Minisitiri w’Intebe wa São Tomé et Príncipe, Patrice Emery Trovoada, yaje akurikiranye na Perezida w’Agateganyo wa Nigeria, Yemi Osinbajo ndetse na Perezida wa Niger, Mahamadou Issoufou

10:25: Perezida Ali Bongo Ondimba wa Gabon ubwo yageraga kuri Stade Amahoro ahagiye kubera umuhango w’irahira rya Perezida Kagame

Perezida Ali Bongo Ondimba wa Gabon asuhuza abaturage bitabiriye uyu muhango

10:20: Perezida wa Centrafrique, Faustin-Archange Touadéra yaje akurikiranye na Perezida wa Namibia, Hage Gottfried Geingob, Salva Kiir wa Sudani y’Epfo na Perezida wa Zambia, Edgar Lungu

10:00: Abakuru b’ibihugu batangiye kugera hano kuri Stade Amahoro. Brahim Ghali uyobora Repubulika ya Sahara niwe ubimburiye abandi.

Brahim Ghali ayobora Repubulika ya Sahara kuva mu 2010. Ni mu gihe iki gihugu gifatwa na Maroc nk’intara yayo.

Perezida Brahim Ghali wambaye ikote ry’ubururu ubwo yageraga kuri Stade Amahoro

Iyi Repubulika niyo yatumye Maroc iva mu Muryango wa Afurika yunze Ubumwe aho iki gihugu gishinja uyu muryango ko wakoze ikosa ryo kwemera Repubulika ya Sahara kandi itabarwa n’Umuryango w’Abibumbye, Ihuriro ry’ibihugu byemera Islam, Ibihugu by’Abarabu cyangwa undi muryango w’akarere uwo ariwo wose, ndetse kuva mu 2000, ibihugu 36 bimaze kwambura uburenganzira icyo gihugu yita “icya baringa.”

Ibyerekeye uyu mwanditsi

CYUZUZO AIME CHRISTIAN

Tanga ubutumwa

%d bloggers like this: